« زهرة صبار في جنينة نار » قصيدة للأديب سيد خليل زيدان

حبنا كان على الصوان منقوش 
لا قدر عليه زمن ولا قدرت وحوش 
بس كان عندنا برق للحيا في الصبا والطفولة 
وكلمة الحب كانت جوه النفوس مغلولة 
لا نقدر نقولها ولا نقدر للحب نحوش 
ومشينا جوه الزمن ما عارفين خطاوينا 
على فين رايحين ولا فين هتودينا 
على الترع والمسارب كانت خطاوى 
بنمشيها يمكن نصادف نسمة عصارى 
شايلة عطر الحبيب اللى بيا مش دارى
بس هو ملك روحى وهفضل أخبى وأدارى 
وتعدى السنين ومعايا للحبيب سيرة وأخبار
يكوينى الحنين يبان عليا حرقة ونار
وأحكيها لرفيق المشوار ألاقى معاه شوية أسرار 
أتارى الحبيب بقى ليه عش تانى ودار 
قفلت بركانى على ورد الأمل في بستانى 
وكتمت الآه ولا قادر أشكى من الألم اللى جانى
مين المظلوم ومين ظالم و جانى 
زمن غادر زمن قادر بيجرح 
وتنزف دموعى ولليأس تطرح
حتى الكلام ممنوع ولا نقدر نقول ونشرح 
وهتقول لمين ومين بالحق يفصح 
وقفلت لمركب الهوى شراع
وفضلت أنعى الحبيب اللى ضاع 
وصبحت مركبى فى دنيا الهوى متلطمة 
ومجاديفى دايبة متحطمة 
ما عادش ليا طريق أمشيه
ولا مرسى أرسي وأرتاح فيه
هو الحبيب اللى كان 
من أول العمر لآخر الزمان
ودايما فى قلبى هيكون 
وهفضل أحبه وأصون 
حتى لو بعيد عن العيون